أفندينا بني مدينة
لسكن الأكابر
يا خينا
و احنا من عمي
عنينا
فهمنا الحكاية
غلط ....
كنا فاكرين
دا تبزير
وقلنا فيه أولويات
كتير
أتاري السر في بير
و طلعنا في غاية
العبط...
كان نفسنا يبني مصانع
أو يعمر صحرا بمزارع
لقيناه بالخرسانه
طالع
و كل شئ إتظبط....
و بنينا أبراج و شاليهات
من العجائب
للأجانب والجاليات
إنما المصانع و المزارع كماليات
و المال من البنوك
إتشفط ....
بنينا سور
ورا سور و قاعة
ونسينا في الزحمة الصناعة
وعلمنا ولادنا ألف طاعة
و الفني
من الحسابات سقط ....
بقينا
دكاترة في كل حتة
والورشة فاضية وناقصة حتة
صرفنا ع
الحجر فوق الروشتة
وعقل البشر
في الصخر إتخبط ...
إفتكرنا إن لينا حقوق
و قلنا من الأزمة نفوق
صحينا لقينا خازوق
و بدل التراب
ناكل زلط ...
أفندينا واخد القرار
و ما عاد لينا اختيار
و الإعلام
عامل زفة و زار
و مالي الشوارع
يفط .....
كله بيأكد إن دا زكاء
من الحكومة
يقضي ع الغلاء
طلعنا احنا
في منتهى الغباء .
و الأمر علينا اختلط
.....
قالوا معدل النمو هيزيد
و الدم هيجري في الوريد
بس اصبروا كام سنة
أكيد
هتلاقوا الدولار
هبط ...
مافيش داعي للقلق
كل شئ مظبوط ع الورق
لو مش عاجبك
اتفلق
و رقنا سليم و كلامك غلط.....
الشعب ليه يعترض
علشان يعني بنقترض
ما كل شئ
عليكم إتعرض
و معدل النمو بيزيد نقط
...
تعيشي يا مصر حرة
مهما كانت العيشة
مرة
بين الأمم أنتِ درة ...
و شعبك يقلب الهم نكت ....
★★★★★★★★★★
).. شعر د / عمر عبد الجواد عبد العزيز){kind=link}
0 comments:
إرسال تعليق