إختيارك ؟..بقلم : وسام علي

مش خَياري ،صدقيني دا إختيارهم ..

_وإنت راضي ؟

مش بإيدي ، القَدر قرر نصيبي ..

كان نصيبي إنك تغيبي

والحياة تفرقنا عُنوة ..

بُعدي عنِك كان جريمة

الحياة مُرة ولئيمة ..

وإنتِ شايفة أهو بعنيكي

طفل تايه دون إيديكِ

كل حاجة بدون وجودك

حالفة تأخد حتة مني

لو ساعات الوقت تنطق

كات هتوصف مُر عمري

والصعاب اللي فـ ثواني

كات بتخلص لو تُمري

كل شيء فرقنا لكن

لسه روحك جنب مني ..

مش بقول لِك تُعذريني

بس طالب لو قدرتي

طاوعي قلبك وإغفريلي ..

الحياة والله مُرة

حتى لو سُكر بدونِك ..

وإعرفي إن فـ كل مَرة

كنت بأمشي طريق بدونِك

النهاية فـ كل سِكة

كات تملي تأخدني ليكي ..

رغم كل فُراق حاصرنا

"لسه سايب قلبي فيكي "🥀

اخر الاخبار