شقيان بقالي كتير أنا
في غيطي
بفلح
عرقان بقالي كام سنه
نفسي ف يوم أفلح
الأرض لسه بور وشراقي
مستنيه المطر من عصر يوسف
علشان تدور السواقي
ليه مبخدش م الحظ غير البواقي
قرصني تعبان الشراقي
وسمه تعبني
كان نفسي أعمر فيها وأعلي وأبني
سقعان بقالي كام سنه فاتت
جعان أوي من زمن عدي
والبرد كوي ضلوعي
وتعبني
وشمس الشتا غرقانه ف حب الليل
أنا اللي لفيت كام بلد
بين الصخر والجلد
أنا ابن نيلك يا بلد
محتاج حضنك محتاج ولد
تايه مابين غربتي ف بلادي
ماليش وريث فيكي
ماليش غير كفن ومسك وعلم
ومتر أرض ف قلب الوادي ؟؟
0 comments:
إرسال تعليق