فين زمان ..خواطر بقلم: شليمار عبد المنعم الروبى

 

 

يا ستي فين القشطه والعسل

والمش اللي طعمه احلي من الحمام

فين الحصان وعروسة المولد 

واحتفالنا بمولد الحبيب

عليه الصلاة والسلام

فين الخروف والعجل

 بتاع عقيقة محمد وحسين ولاد الجيران

فين دا ياستي  وياسيدي ..

قالوا راح مع الأحبه

 اللي كان كلامهم يداوي الجراح

دا كلهم كانوا  في الدار والغيط

يزرعوا  الحب والامان

 فين القلوب الطيبه

 اللي عمرها ما تغش

ولا تبيع الغالي وترخصه

وتشترى الرخيص وتعلي له  المقام

 فين حكمتك وحكمة سيدي

 وكلامكم وضحكتكم

من غير غش  تنور المكان

 يا ستي فين العسل والسمنه

 و اللبن الرايب بتاع زمان

فين المحبه بين الأهل والجيران،،

 فين اللي عرفوا الصح  وكبروه..

وعيبوا العايب وراجعوه.

 يا سيدي  فين صحبتكم ولمتكم

 للاهل والجيران وسط الدار..

 فين الكرم والجود ..

فين قاعدة  الصلح في المضيفه

 والبقلاوه تحلايه  للجيران

فين الموده والصحبه والجيره المخلصه.

يا سيدي فين الرجاله الحره

 اللي زرعت الهيبه فين الأصل

والجدعنه والحنان والطيبه.

فين كوباية الشاي لما كنا  نسمع الصييطه

فين اللي عاشوا بأدب ولا يعرفوا العيبه ..

 قالوا يا ولدي القلوب اتغيرت

من يوم ما راحوا الحبايب.

كان في موده ورحمه وحب من غير غش..

 وكان الفرح  يتغنى في كل دار من دار الحبايب..

 تلاقي طبق عندى وطبق  من عندك

 إتعشت كل الحبايب بالحب من غير غش

يناير 08, 2024