قال الله عز وجل ( لَقَدْ خَلَقْنَا الْإِنسَانَ فِي كَبَدٍ )
اعتراف رباني ان هذه الحياة كلها صعاب وتحديات تلازم الانسان طوال عمره ويقابلها بتوفيق من الله سبحانه وتعالى بترتيب العقل الذي وهبه الله للإنسان
ولكي تستمتع بالحياة بالعمر الموهوب لك من الله سبحانه وتعالىخليك دايما حسن الظن بالله وبكل عطاياه وده هيخليك دايما متفائل وعندك ثقه ان ربنا دايما معاك .
احرص دائما ان اي مكان تروحه واي مجلس تجلس فيه اترك فيه أثر طيب وريحة خلقك الطيب تفوح في أركان المكان وعلى كل الموجودين .
لو اتظلمت اوى من حد اوعي تفكر تنتقم منه اكظم غيظك جواك واترك لربنا الامر في خلاص حقك من الاخرين ربنا عدل ومش بيرضى بالظلم وحرمه علي عباده وهتلاقي حقك هيجيلك لغاية عندك واكثر ماكنت تحلم به .
خليك واثق انك مش هتتعلم من الدنيا ببلاش كل موقف هتمر بيه هيعلمك حاجه جديدة وهياخد من صحتك وأعصابك وممكن تفقد ناس كانو غاليين عليك علشان تتعلم ومهما وصلت من العمر سينتهي العمر ولسه فيه حاجات مش هتتعلمها .
اهتم اوي باللي بيحبك ومخلص ليك هتحتاج في حياتك لرفيق درب مهما كانت درجته عندك ..صديق ..حبيب ..اخ ..حبيبه ...الرفيق المخلص ده من ارزاق ربنا عليك باعتهولك منحه منه تتركن عليه في وجعك وحزنك وفرحك وحافظ لسرك ويقف جنبك في محنتك ...اهتم ..وحافظ عليه اوي وما تتبطرش علي نعمه ربنا بعتهالك غيرك يتمناها .
ازرع في ولادك الرحمة وحب الخير وعمله خدهم معاك وانت بتعمل خير خليهم يحبوه لانك كده بتسيب ليهم اكبر رصيد انهم ممكن بعيشو بدعوه حلوة مخلصه من قلب طيب ..وكمان رصيد حسنات ليهم بعد مماتك ..وكمان اي عمل خير هيتعلموه منك هيكون صدقه جاريه عنك بعد ماتموت .
خليك مش اناني في تعاملاتك مع الآخرين يعني ماتطلبش مالا تقدمه ..حاول تبدا انت هتلاقي اللي قدامك اجبرته انه يبادلك سواء ..معاملة حسنه ..اهتمام ...مواقف ...بس ده مش مع اي حد ده مع الناس اللي انت عاوز تحتفظ بيهم في حياتك .
ماتحاولش تبرر لحد مش هيفهمك موقف او تصرف منك ..ماتتعبش نفسك في نقاش وجدال يوصلك لحالة نفسيه ...سيئة هو بمرور الوقت هيفهم ..لكن اللي عارفك كويس وفهمك كويس مش هيظن فيك سؤ و هيفهمك من غير تبرير ..وان استدعى الأمر للتوضيح هيكون اسهل للي عرفك وفهمك بس
احترامك للاخرين وزوقك في التعامل اولا بيدل علي شخصيتك وبيئتك اللي اتربيت فيها ..احترامك ده بيسهل ليك امور كتير اوي في حياتك ..الراحة النفسيه في الحديث تخلي الطرف التاني حابب يتعامل معاك ..حابب يقدم لك خدمة ..حابب يسهلك الصعب ..خلي ذوقك دايما مبدأ للتعامل .
افتكر دايما ان مفيش حد يستاهل حزنك ووجعك الا اللي بتوجعه دمعتك ووجع قلبك ..
استخدم كل الطاقات اللي ربنا رزقك بيها
الحب ..الاخلاص ...الاهتمام ...الصدق ...القلب الطيب ..طاقات كتير ربنا خلقها فبنا لازم تستخدمها في حياتك وزي ما قولنا هتتصدم كتير علشان تتعلم اكتر .
واخيرا ماتنساش ان كثرة الاستغفار بيفك الكرب وبيزيل الهم ..ورسولنا الكريم اولي الناس بيه يوم القيامة هم اللي بيصلوا عليه ...اللهم صل وسلم وبارك عليك ياحبيبي يارسول الله
0 comments:
إرسال تعليق