برضو نرجع ونقول ونتكلم ونشوف ايه اللى شاغل بال الناس ولو ملقناش حد نكلمه نكلم نفسنا...ماهو دا الطبيعى في الايام دى كل اللى شاغل بال الناس الاكل والشرب والاهم اللبس معتش حد بيعرف يعمل حساب المرض لان ده محدش بيعرفله معاد..اهم شئ اللبس البس وظبط امورك ووقت الجد اعوى وهوهو لانك لابس ومتشيك ومفيش في جيبك تمن الغدا..دا كلام من قاموس الريف المصرى
المهم انك لو قعدت قعده بنتكلم مع كل الناس في كل شئ من السياسه للكوره هما دول اللي بينسوا الناس همهم وارفهم حتى وقت الكلام الناس بتنسي اولويات بيوتها وكانهم عايشين علي قناطير مقنطره من الفلوس اللى تخليهم قاعدين يتكلموا ويخترعوا اراء وكأنهم خبراء في كل شي ..الواحد بيرجع بيته مصدع وارفان ويبدا كل الكلام والحديث ده يدور في راسه حتى بيترجى النوم ومش بيرضى يخمده
واخيرا الواحد ينام بس باله مشغول ونومه زى السكران ويبدا يحلم ويستطلع الاحلام فمثلا حصل معايا فى يوم ومن كتر اطمئنانى ان الاشيه معدن نمت بعد وقت طويل من التفكير وفجاه لقيت صوت عالي بينادى علي قوم يلا انت مش سامعنى يلااااااااا معاد شغلك قوم..قمت زى اللى واخد بنج ابص شمال ويمين لقيتها مراتى ام احمد اه والله ام احمد ايه فيه ايه حد جراله حاجه لقيتها بتضحك وكلامها غريب وبتسال اسئله غريبه لدرجة انى استغربت ..هو فيه ايه هو انا كنت بقول كلام حب لحد فى الحلم والا اتجوزت وانا بحلم ..فيه ايه..وبعد كام يوم من الاسئله والجدال والنقاش والشد والجذب واحيانا احيانا الحنيه..اه امال ايه منا عاوز اعرف هو ايه الصوت ده اللى قالتلى عليه كنت كل شويه تعمله وانت نايم ..ولما لمحت لى عن الصوت افتكرت الحلم اه...اه ه ه ه ..دا انا نمت وكنت بحلم وكل شويه فى الحلم استغرب لانى مش مصدق ان دى عيشتى ودى حياتى لانى عارف الواقع اللي عايش فيه وعارف وفاقس الظروف والمرتب اخر الشهر ومصاريف العيال والغلا والكوى اللى احنا فيه وحاجات كتير من بتاع الفلاحين هههههه
ال ايه كنت بحلم انى خلاص البليه لعبت ولا بقيت استنى مرتب ولا فارق معايا الفلوس والمصاريف وبقي عندى قريه سياحيه وفى وسطها فيلا خاصه بي وكام عربيه بسواق ادام الفيلا غير عربيات الاولاد وعربيه ام احمد وان كل دقيقه يجيلي رساله علي الموبايل ان رصيدك في البنك زاد وكل ما يجيلى رساله الصوت يطلع ويعلى ويعلى.. اصحى من النوم افطر حاجات غريبه كده مش شكل الفول والطعميه والبصل ربنا يديمها نعمه حتى اسم الاكل مبقتش اعرفه لا في غدا ولا في عشا ..لا وايه كمان بقيت اعرف كل مشاهير العالم وكلهم بيتمنوا يشوفونى وصور تذكاريه تقولشى عنخ حانوت او مينا موحد القطرين... حلم بقه وحلم فشيخ جدا ايه يعنى ماتحلم ياض هى الاحلام بفلوس والا عليها حذر ..هى حتى الاحلام هيحرموها..هما اللى عندهم قرى سياحيه احسن مننا في ايه ما الكل عارف فلوسهم جت ازاى ومنين بس محدش بيقدر يفتى ولا يتكلم..
الكل الوقتى بيتمنى يشوفنى او يكلمنى او حتى يعمل معايا مشروع ماهو اخر مشروع كنت بفكر فيه انى اتعاقد على مكوك فضاء عشان اطلع اسهر فوق القمر وانزل الصبح في ضوء النهار براحتى اصل انا مبعرفش اسوق بالليل ولما اتعاقدت على المشروع الاعلام في العالم كله بقي يتكلم لان دا واحد من لستة المشاريع اللي بفكر فيها خارج نطاق الواقع . وبرامج ومواعيد والكل عاوز يشارك وكل ما اشوف حد كنت اتمنى اكلمه واقف ادام الفيلا عشان معاده يقابلنى مش مصدق والصوت يعلى قوى اوى ومن علو الصوت ام احمد تقلق وكلام بقه تنقيع في سرها عشان مش عارفه تنام وانا مش دارى باللى بعمله ..الخلاصه يعنى ان الزهر لعب قوى قوى والدنيا لفت واتغيرت وكل يوم فى بلد شكل حتى شكل الاولاد نسيته ومبقتش اعرف سن حد فيه المهم انهم فاكرين شكل ابوهم اللى هو انا صاحب الصوت اللي امهم سمعته والل مشغول بمشاريعه ونسى شغله والاشكال اللى فيه
دا حتى نسي اهله وبلده ما الدنيا مشاغل وطول اليوم قاعد يعد فلوس ويحول فلوس حتى بقي يتعب من عد الفلوس وجاب ناس شغلهم تعد الفلوس لان الداده اللي ربته كبرت ونظرها ضعف فصعبت عليه...كل دا والصوت بدأ يبقي قريب من بعضه وصوت عالي مقلق دا حتى في الحلم بقت مشوايرى جوه البلد راكب صاروخ مخترعه عشان مش فاضى ومعنديش وقت ...سبحان الله هى الدنيا بقت كده يا اولاد
والا انا بحلم سبحان الله لسه بكمل الحلم وهركب صاروخ رايح اقابل ترامب بتاع امريكا كان مستسمح وواخد معاد لقيت صوت ام احمد ..صحيت مع اخر صوت كنت بطلعه ورن فى ودنى وهى بتقول البنزين غلي وانت مفولتش امبارح وانت جى من شغلك طول عمرك ف.......اه ..اه ..اه يسواااادى
فضلت يومين تلاته اسئل ام احمد ايه نوعيه الصوت اللى كنت بعمله وانا نايم وبعد احراج شديد وتنويه منها ومش صراحه فهمت انى كنت بطلع صوت عيب هههه
بش...بششش
لانى هربت من سواد الواقع لسواد الخيال
المهم ام احمد فهمت بس محكيتش لها عن الحلم كامل
احسنت أستاذنا الفاضل
ردحذف