وصبحنا بنداري الوشوش
بألوان كتيره مع الرتوش
والأصل ضاع
بين اللي خان و اللي باع
وكتير ما بينا ما نعرفوش
واللي إختفا ومالقينهوش
وفنون خداع
فتحت علينا أبواب ضياع
والحق راح ماشوفناهوش
بين كدب وكتير من نقوش
وزاد الصراع
بين الأسود وبين الضباع
وكلاب وغيره من وحوش
فينها الحقيقه ما نعرفوش
والزيف دا شاع
أصبح حقيقه على المَشاع
والصدق تاه ما عرفنهوش
وصوته حتى مانسمعوش
ومات الجياع
من الألام ومافيش سماع
واللي سمعوا ما بيشوفوش
ولا فيه شجاع قادر يحوش
وعاش القناع
وبسببه مات شُرفا وسباع
واللي إختفا وبدون نعوش
وصحابه بينا ما يخلصوش
0 comments:
إرسال تعليق