ايه اللى جرى
يارب الورى
واقفين طوابير
وكلنا عيانين
منعوا عنا العلاج
لا عارفين نقول
آه
ولا الدمع ينزل
م العين
هو القرآن
معدش بيتقرى
ولا الزمان افترى
هربت الرحمة
م القلوب
لا مستشفى نافع
ولا دكتور شافع
*******
إيه اللى جرى
يارب الورى
أبويا نايم
بقاله أربع سنين
الكنسر أكل عضمه
وبيروح فى غيبوبة
كل يوم واتنين
لا عارف أحوش الآه
ولا أأقله الوجع
فين
ما زى أبويا
ناس كتييييير
قاعدين منتظرين
الموت بخفا حنين
إيه اللى جرى
يارب الورى
واقفين طوابير
وكلنا عيانين
كان زمان
بيصحى بدرى
ويصلى الفجر
ويمشى فى الشارع
يقول الوتر
يولع المنقد
ويحط الكنكة
على القدر
ويحط العيش
عشان يلد
ويجيب شوية دقة
ويغير ريقه على
القد
ويصحينى ويقولى
يا حافظ
انته عايز البتر
ليه يا آبا
عشان مصلتش الفجر
وبتتكلم فى السياسة
دا النجم إذا هوى
بيحرق حتى
اللى على البر
يا ابنى نام
عشان يبقى
عندك قصر
******
أسرح معاه الغيط
ينزل الأرض حافى
وأنا وراه ماشى
ينقى الدنيبة من
الرز
وحر الصيف قاسى
أشوف قطر
الساعة عشرة ماشى
يبصلى ويقولى
علف المواشى
******
إيه اللى جرى
..
يارب الورى
واقفين طوابير
وكلنا عيانين
ولما اتخرجت
كان جدى الكبير
أحب أسرح معاه
عشان بيحكيلى
قصص الهلاليه
أبو زيد ويونس
وجازيه ووطفه
وعبد الناصر
وتأميم القناه
كان عنده سبعين
سنه
وعمره ما قال آه
وفى يوم ركب الحمار
وشق على الأطيان
ورجع قال آه
وكان الكنسر
اللى ما نعرف مداه
*******
إيه اللى جرى
..
يارب الورى
واقفين طوابير
وكلنا عيانين
ولاد الإيه
صرفوا ملايين
عشان عدسة
تتركب فى العين
منعوا عنا العلاج
واحنا محلتناش
مليم
وأبويا نايم ممدد
رجليه
مش عارف أعمله
إيه
نادى عليه فى يوم
وقالى
فاكر يا حافظ
لما قلتلك
انته عايز البتر
فاكر يا آبا
انته صح
ودول ولاد كلب
أنا عمرى
ما شربت سيجاره
ولا يوم رحت خماره
ولا سرقت عشان
أبنى عماره
وبيتى مفتوح للماره
وبدفع ضريبة المال
على الأرض الخسرانه
وفى الآخر
يعالجوا نسوانهم
بفلوسنا ويقولوا
الخزنه خربانه
ربك مبينساش ضعيف
ما دامت قلوبنا
بالإيمان عمرانه..!!
0 comments:
إرسال تعليق