تصحيح مفاهيم في حمله 100مليون صحة

كتب :  أحمد عرابي

1- تحليل فيرس C اللي بيتعمل حالياً في حملة 100 مليون صحة تحليل مبدئي و اسمه تحليل( أجسام مضادة لفيرسC)

2-الأجسام المضادة دي عبارة عن إستجابة من جهازك المناعي بسبب وجود أجسام مجهرية غريبة عليه وبيقاومها ، نتيجه الإصابه بالفيرس قبل كده سواء كان الفيروس نشط او لأ
3 - تحليل الأجسام المضادة اللي في الحملة ينفي الإصابة ولكن لا يثبتها
- يعني لو طلعي عندك سلبي فإنت زي الفل وتروح بألف سلامه
- ولو طلع عندك إيجابي فمعناه إن إنت عندك الأجسام المضادة لفيرس C ودا مش معناه إنك مصاب بالفيرس 🤚

4- صعب تحليل يأكد وجود اي فيرس يتعمل في الشارع وبنقطة دم وفي خلال تلت ساعة .. ولكن اللي بيحصل حاليا هي أسرع طريقة بما ان العدد المطلوب فحصه كبير ودا الطبيعي جدا أنه يحصل فنيجي بقي للخطوه اللي بعدها

6- المتخصصين في الحمله بيحول المواطن اللي طلع عنده تحليل الأجسام المضاده إيجابي علي أقرب مكان ليه يعمل فيه تحليل PCR لفيرس C التحليل دا بيأكد وجود ال فيرس وكميته والطبيعة الجينية ليه

ودا طبعا صعب يتعمل لكل الحالات لأنه بياخد وقت وتكلفة أكبر فعشان كدا بيتحول المواطنين اللي طلع تحليلهم إيجابي لأماكن متخصصه لعمل التحليل دا ، ال PCR بياخد من إسبوعين لاربع أسابيع .

7- لو النتيجة طلعت إيجابيه في الحملة والمريض راح عمل PCR وطلع نتيجته سلبية دة معناه ايه ؟!!!!!

- دا شخص شُفي تماماً ومعناه إنه كان مصاب بالفيروس زمان وجهازه المناعي ساعتها قدر يقاومه و الأجسام المضادة فضلت موجودة في جسمه لكن الفيروس غير نشط ومش معدي. ومجازاً البعض بيطلق عليه الحامل الصحي للفيرس

8 - طيب الناس اللي عملت التحليلين واتأكدت ان عندها الفيروس ؟؟!!
أولا شفاكم الله وعافاكم .. ثانيا تحليل ال PCR مش بيقيم الحالة الصحية ليك إطلاقا.
يعني مثلا لو انت مكتوب في التحليل بتاعك مليون واللي جنبك 15 ألف دة مش معناه ان حالتك الصحية وحالة الكبد عندك أسوأ منه أو العكس ( طبعا دة في حالة فيروس سي ) .. العدد كان بيفيد زمان أيام العلاج بالانترفيرون.

9- تقييم الحالة الصحية بيتم عن طريق حاجتين :
١- تحليل وظائف الكبد :
( PT - PTT - Albumin - Globulin - AST -ALT - LDH - GGT - ALP - Bilirubin )
و تحليل صورة دم كاملة (CBC)
٢- أشعة تليفيزيونية على البطن

10- مسار المرض بيتحدد بعوامل تانية زي النوع الجيني للفيروس و وجود إصابات تانية زي فيروس بي أو السكري أو السمنة المفرطة .

11 - على حسب حالتك الصحية ومسار المرض بيتم توجيهك للمكان المناسب اللي هتاخد منه العلاج وتخف إن شاء الله .

12- الحمله كويسه كمسح شامل للمرضي بس كان واجب نصحح المفاهيم دي عند الناس عشان يبقوا فاهمين هيعملوا إيه بعد كدا

13- نسبة الشفاء تقترب من 100% .. والعلاج مكلف علي النفقه الخاصه و توفيره علي نفقه الدوله خطوه ممتازه وإن شاء الله بحلول 2020 هتبقي مصر خاليه تماماً من فيرس C ودي مبادره تُحترم جدا لأنها حققت حاجه كان نفسنا نعملها من زمان.

المصدر: صحف علمية 

مارس 14, 2019