الفنان الشاب الصاعد" كريم عميرة" ..لـ"الزمان المصرى" .. بحب التمثيل جدًا وحلمي أكون رقم واحد وأقدم أدوار تشبه جيلى

 

الزمان المصرى : خاص

 كريم عميره أحد الممثلين الشباب الصاعدين في عالم الدراما والمسرح أجتهد في سن صغير لتوصيل موهبته إلي الجمهور حيث البداية كانت في ” مسرح تياترو النيل ” الخاص بالفنانة بدريه طلبه .. كانت البداية ومن ثم تطورت أعماله وبدأ اسمه يُعرف في الصحافة وبعض المحطات التليفزيونية وشارك أيضاً في أعمال سينمائية

وكريم عميرة ممثل مصري ولد  في بلقاس التابعة لمحافظة الدقهلية عام 2004 يبلغ من العمر 20 عامًا بدأ حياته بالتمثيل المسرحي وبأدوار صغيرة حتي وصل للسّينما والبرامج التلفزيونية الشهيرة وايضًا الجرائد الصحفية

موقع جريدة ومجلة "الزمان المصرى " حاورت الفنان والممثل  الصاعد” كريم عميره ”

 

*في بداية حوارنا عرفنا بنفسك اكتر؟

**أنا كريم عميرة مواليد بلقاس محافظة الدقهلية عندي 20 سنة بحب التمثيل جدًا ودا حلمي ونفسي أكون رقم واحد في التمثيل ودايمًا عندي إحساس إني مش حابب أكون مجرد ممثل عادي فَطول الوقت عندي طموح ونفسي أحقق نجاح كل ثانية سواء على مستوي شغلي أو على مستوي دراستي أو في الحياة نفسي أفتح أكتر من مشروع فطول الوقت عندي طموح إني نفسي أنجح نجاح مش عادي في وقت قصير وسن صغير ودايمًا بصلى وأقول يارب وأنا واثق في ربنا وموهبتي وإني هحقق كل ده قريب جدًا ونفسي برضو أكون مصدر طاقة إيجابية لكل الناس والشباب فَأنا عندي أحلام كتير جدًا هوصل لكُل أحلامي في سن صغير ".

*هل مجال دراستك لها علاقة بالفن ؟

**لا ملهاش علاقة.. انا درست ورشة فنية شاملة واتعلمت منها احترافية التمثيل وكل حاجة عن التمثيل أما عن دراستي فأنا بدرس كلية تمريض

*أهم الأشخاص اللي كان لهم دور في حياتك ؟

**بصراحة.. اهلي وبس ..اللي كان لهم دور ..أما الناس كانوا مفكرين الموضوع مجرد هواية فقط لكن الآن أصبح حلم لناس كتير ونفسهم يعملوا زيي والحمد لله على نعمة ربنا علي ولسه هعمل كتير جدا

ا*كثر الفنانين الذين تأثرت بهم متأث سواء من الجيل الحالي أو الفنانين الراحلين ؟

 

**الفنان الراحل احمد ذكي والزعيم عادل امام أما فى الوقت الحالي بحب محمد رمضان وبحب شغله علي نفسه جدا وبحب جدا الفنان الكبير”  احمد العوضي ” تمثيله فوق الروعة وبيركب الشخصية بطريقة جبارة أما بالنسبة للفنانات بحب جدا جدا الفنانة ياسمين عبدالعزيز شخصية وجميلة جدا وتمثيلها فوق الروعة .

بس لو علي قدوتي مع احترامي لكل الفنانين طبعا بس أنا قدوتي نفسي بعد عشر سنين قدام ودايما نفسي اعمل مدرسة تمثيل بنفسي ويكون لي اسلوبي الخاص فى التمثيل مكونش زي حد نفسي ابقى قدوة  للناس وحلم لهم  ميبقاش قدوتي حد واقلده

*اكتر حلم نفسك تحققه ؟

**نفسي اعمل فيلم سينمائي بطولتي ويتعلق بوستر الفيلم فى جميع السينمات وفي كل الدول العربية ونفسي وحلم من احلامي اني ادخل هوليوود وزي ما قدرت أحقق اللي حققته هحقق دول كمان بس مع الوقت وربنا يديني علي قد مجهودي وتعبي

*الفنان اللي نفسك تشارك معاه عمل فني ؟

**مفيش فنان معين بس لو هيبقي في فرصة ونا اللي هختار هختار الفنان محمد رمضان أو الفنان احمد العوضي لاني بحبهم جدا وبحب شهرتهم واجتهادهم علي نفسهم

أ*ي هي أكثر الألوان اللي بتميل لها في الأعمال الفنية الدراما أو الرومانسي أو غيرها من الألوان ؟

**بالنسبة لي بقدم اي حاجة سواء دراما كوميدي رومانسي صعيدي اي نوع من التمثيل عموما واي مشهد بشتغل عليه بعمله بكل احتراف لان بإختصار مفيش ممثل ناجح يميل لحاجة معينة اللي بيترشح ليه بيعملوا بكل طاقة وإحساس على المشهد

*تم استضافتك في بعض البرامج التلفزيونية ..فى أى البرامج ظهرت؟

**كتير الحقيقية برنامج شباب علي الهوا وبرنامج شباب كل يوم وبرنامج مصر جميلة وبرنامج الحياة شباب وبرنامج نهارك سعيد وبرنامج مهنتي غيرتني وبرنامج حكايتك ايه وبرنامج ابتدا الحلم وغيرهم كتير وعلي قنوات كبيرة جدا

*في رسالة حابب توجهها ؟

**اكيد طبعا ..كل واحد مننا عنده حلم وحاجات كتير عاوز  يحققها بس مش عارف يعمل اي ومستني الفرصة تجيله.. نصيحتي لكل شاب حابب حاجة قوم وكافح واسعي ودور على الفرصة فين واستغلها متنمش وتقول بكره تحلي لا لازم تسعي وتعافر عشان ربنا يكرمك عشان بإختصار ربنا مش هيسيب واحد مكافح وبيسعي عشان يوصل ويجي لك وينولك املك اكيد لا ربنا قال اسعي يا عبدي وأنا اسعي معاك قوم واسعي وصلي وقول يارب وتأكد مليون فى الميه ان عمر ربنا مهيضيع تعبك وسعيك عشان أنا جربت والحمد لله وصلت ولسه بوصل وهوصل لأعلي المراتب طول منا بسعي وبقول يارب وبالتوفيق للجميع

سبتمبر 18, 2024