الزمان المصرى: مريهان عماد
نشر الكاتب الصحفى مدحت محى الدين على صفحته الشخصية على موقع التواصل الاجتماعى فيس بوك تويتة : "زواج القاصرات"..من أسوأ الحاجات اللي موجودة في بعض القرى و الأرياف هى ظاهرة زواج القاصرات؛ تلاقي الأب والأم من دول يدوب بنته تبلغ من هنا يقوم يجوزها من هنا، مابيهموش إنه يخالف القانون و تهون عليه بنته...لا لسه طلعت بطاقة والا يا روحي تكون لسه بطلت لعب مع الأطفال اللي في سنها، و يقرر أهلها إنهم يرموها و يرموا مسئوليتها على راجل عشان يرتاحوا من مصاريفها...شئ بشع لما أهل يقرروا يقضوا على طفولة بنتهم و يكبروها قبل أوانها و يحملوها فوق طاقتها...ده غير جريمة التزوير اللي بيعملوها و بيشاركهم فيها مأذون ماعندوش ضمير إنهم مايقدموش شهادة ميلادها الحقيقية وقت الجواز و يروحوا يسننوها عند أي دكتور برضو معندوش ضمير و يكتبوا لها ورقة عرفي و ماتطلعلهاش قسيمة جواز إلا بعد ماتكبر و تعدي السنين و تقدر تطلع بطاقة...و لو خلفت قبل السن ده ابنها مابيطلعلوش شهادة ميلاد إلا بعد سنين....بجد حاجة تحزن؛ ليه الأب ممكن يموت قلبه و ضميره و يؤذي بنته بالشكل ده؟! كل ده عشان خاطر الفلوس؟! و هى الفلوس عندك أغلى من ضناك؟! الناس دي لما هى مش عارفة إن الخلفة أمانة و مسئولية و إن التربية الصحيحة واجب عليهم بيخلفوا ليه؟! حرام بجد لازم كل راجل و ست مقبلين على الزواج يفهموا إن الخلفة رزق و أمانة و مسئولية لازم يحافظ عليها و يتقي الله...و افتكر إنك لو هربت من حساب الدنيا مش هتهرب من حساب الآخرةلك
0 comments:
إرسال تعليق