منى الحديدى تكتب للرئيس السيسى :"أوجعتنى" وأنا من أشد مؤيديك

تعقيبا علي سؤال سيادة الرئيس عبد الفتاح السيسي للشعب أثناء منتدي شباب العالم "عاوزين تبنوا بلادكم وتبقوا دولة ذات قيمة ولا حتدورواعلي البطاطس؟" الذي أثار تساؤلات كثيرة داخل كل مواطن

سيادة الرئيس كم أوجعتني هذه العبارة وربما تكون أدخلتني في حالة نفسية سيئة لأسباب عديدة سأذكرها في مقالي هذا

إن اللي اهتموا بالبطاطس ووجعهم سعرها المرتفع دول الفئه البسيطة الفئة محدودة الدخل والمعدومة الدخل أيضا

إن اللي صرخوا عند ارتفاع سعر البطاطس دول اللي مش قادرين علي سعر الفراخ واللحمة واكلات الأغنياء وأصبحت البطاطس المفر لهم ومن أساسيات وجباتهم اليومية

وخصوصا ان كمان سعر الفول ارتفع اللي كان ممكن كتير من البسطاء يعدوا يومهم بيه

إن اللي صرخوا وقالوا مش عرفين نعيش والأسعار عاليه لما بالتحديد البطاطس ارتفع سعرها الناس دي ممكن تكون عيشه عليها فقط وراضية وبتنام وبتحمد ربنا

ناس مش بتطلب شقه في العاصمة الادارية ولا وظايف في أماكن مرموقة ولا تعلم ولادها في مدارس وجامعات خاصه ولا بتطلب تتعالج في مستشفيات خاصة

ناس بسيطة اوي عيشه بالفطرة وهم دول الناس اللي ربنا سترها مع بلدنا بسبب طيبتهم وقناعتهم والرضا اللي مالي قلوبهم

ممكن أوي نبني بلدنا وتبقي احسن بلد في الدنيا دون ان نمس قوت المواطن البسيط اللي لما يكون المواطن ده قادر يعيش وياكل ويشرب ويتعالج هو ده استقرار وامن وامان البلد وتستمر مسيرة البناء والتطوير والارتقاء بالبلد

الفئة دي ياريس اللي نزلت كل شوارع مصر لتأييد سيادتك وعشمهم في ربنا كبير انهم يعيشوا عيشة كريمه مفيش فيها حرمان ولا قهر

أغنياء البلد كتير اوي ورجال الأعمال كتير الفئة دي عليها حق للبلد ولفقراء البلد ..ليه نيجي علي الغلبان لبناء الدولة ؟

فئة الأغنياء والمؤسسات اللي مرتباتها في السما ..الفئة دي مهما تدفع للبلد هتعرف تعيش عيشة كريمه لكن البسيط لاحول له ولا قوة

الموظف ياريس اللي مرتبه واقف من ٢٠١٤ والأسعار بترتفع بما يفوق قيمة الراتب بمراحل يعيش منين وازاي ؟ وسعر البنزين اللي ارتفع ورفع كل حاجه معاه ..واللي دافع التمن المواطن البسيط ومحدودي الدخل

حقيقي الشعب ده شعب صبور وبيتحمل الصعاب والمحن الوطنية في دمه وحتما سيزداد الصبر والتحمل لبناء بلدنا عندما نجد ان جميع فئات الشعب علي نفس القدر من تحمل المسؤولية

بل نرفع العبأ عن البسيط ومحدودي الدخل ويكون لأصحاب الأموال وأثرياء البلد النصيب الأكبر من تحمل المسؤولية حتي تتزن المركب.

ولكننا هنا نقحم فئة معينه وللأسف هي الفئة المطحونة التي تعيش بأقل القليل وتتغاضي عن العديد من متطلبات الحياة ومتعتها

وعلي الجانب الأخر هناك من لايعرفون عدد الأراضي والعمارات والأموال والسيارات التي يمتلكوها

ولم يشغلهم ارتفاع سعر البطاطس .

نوفمبر 08, 2018