اعداد: اكرام أبو النصر
فيه ناس كتير بتعيش يومها وهي بتحارب حاجة
مالهاش ملامح واضحة، وجع منتشر في الجسم كله، تعب مش بيروح حتى لو ناموا طول اليوم،
مخهم مش صافي كأنه في ضباب تقيل، وأحيانًا مع كل ده بيحسوا إنهم فقدوا السيطرة على
حياتهم.
🔻
ده اسمه فايبروميالجيا " متلازمة الألم العضلي الليفي"
🔻
يعني إيه فايبروميالجيا؟
هي متلازمة يعني مجموعة أعراض بتتجمع مع بعض وتكون مرض مزمن
.
أكتر حاجة بتميزها إنها وجع عام ومزمن بيأثر
على الجسم كله.
والغريب؟ إنك تعمل تحاليل كتير وتطلع كلها
كويسة جدًا، ومع ذلك الوجع موجود بكل تفاصيله كأن المخ بقى بيركز على إشارات الألم
أكتر من اللازم، ويضخمها بطريقة مش طبيعية.
🔻
طيب ليه بتحصل أصلا؟
العلم لسه بيدور على إجابة كاملة لكن لحد
دلوقتي في بعض الأسباب اللي استقروا عليها زي :-
◽️ التعرض لضغط نفسي لفترة طويلة،
صدمات نفسية أو حتى تراكم مشاعر سلبية لسنين.
◽️خلل
في معالجة الألم داخل المخ والحبل الشوكي.
◽️اضطراب
النوم المزمن النوم المتقطع أو السطحي جدًا.
◽️عوامل
وراثية لو في العيلة حد بيعاني منها، بيزيد احتمال الإصابة.
◽️بعد
الإصابة بعدوى فيروسية أو مرض مزمن أحيانًا الجسم "يفضل على وضع التعب" حتى
بعد الشفاء.
◽️اضطرابات
في هرمونات التوتر والمزاج زي السيروتونين والدوبامين.
يعني باختصار الجسم والعقل في حالة
"استنفار" دائم.
🔻طب إيه أعراضها بالضبط؟
خلينا نقولها كده ببساطة زي ما المريض بيحسها:-
◽️وجع
في كل الجسم، أو كأن في أماكن معينة بتوجع أكتر زي الكتفين، الرقبة، الظهر.
◽️تعب
وارهاق كأنك مجهد طول الوقت.
◽️النوم
مش بيريّح، تصحى تعبان أكتر.
◽️ الضبابيه الدماغية يعني صعوبة في تركيز، بتنسى الحاجات البسيطة، مخك مش
بيشتغل كويس.
◽️صداع
نصفي متكرر.
◽️ اضطرابات في المعدة أو القولون.
◽️حساسية
من الصوت العالي أو الضوء القوي.
◽️شعور
عام بالإحباط والضغط النفسي.
🔻
الأثر النفسي؟
ده أصعب جزء.الناس اللي عندهم فايبروميالجيا غالبًا
بيتقالهم انتي بتبالغي
يمكن ده تعب نفسي؟
اعملي شوية رياضة وهتبقي كويسة
بس الحقيقة مش كده الألم المزمن بيسرق منك
طاقتك النفسية،
بيخلي مزاجك دايمًا مضطرب. ممكن يوصل لدرجة
اكتئاب أو نوبات قلق شديدة. بتبقي في دايرة مغلقة الجسم موجوع → النفسية تعبانة → الجسم
يزيد وجعه أكتر.
🔻طيب إيه الحل؟
مفيش علاج جذري للفايبروميالجيا ، لكن فيه
إدارة ذكية جدًا للحالة، واللي بيجمع بين 3 محاور:-
1. العلاج الطبي.
أدوية بتساعد على تخفيف الألم، وتحسين النوم،
وبعض مضادات الاكتئاب بتقلل إشارات الألم في المخ.
2. العلاج النفسي .
زي العلاج المعرفي السلوكي (CBT) بيعلمك إزاي تتعاملي مع
الألم بدل ما الألم يتحكم فيك وازاي تحسن جوده حياتك.
3. تغيير نمط الحياة.
نظام غذائي مناسب لطبيعة المرض
تمارين رياضية خفيفة زي المشي أو اليوجا.
تنظيم النوم.
جلسات استرخاء أو تنفس عميق.
دعم نفسي، سواء من مختصين أو من أشخاص مرّوا
بنفس التجربة.
💡وأهم حاجةصدّق إحساسك
ما تسمحش لحد يقلل من وجعك، حتى لو التحاليل بتقول إن كل حاجة تمام. الجسم مش دايمًا
بيصرخ في الأشعة، لكنه بيصرخ في إحساسك وحضنك لنفسك هو أول خطوة في طريق العلاج.
شفاكم الله وعافاكم
0 comments:
إرسال تعليق