في الفتره الاخيره انتشر علي صفحات التواصل هاشتاج لازم تنضف.. واللي فعله وشيره ابناء الدقهليه وخصوصا رموز كتير من قاطني المنصوره عاصمة الدقهليه ومدينة السحر الجمال سابقا.. رموز كتير وشخصيات عامه مش عاجبهم حال بلدهم اللي حبوها وتركوا مدنهم وقراهم وفضلوا المعيشه فيها علي ايام ماكانت جميله وساحره.. لكن الان اتشقلب حالها ومبقتش مدينة السحر والجمال بقت مدينه الفحر والمطبات في الشوارع.. والزباله والكلاب الضاله والقطط.. يعني من الاخر مدينه بالاسم فقط وكل مرافقها وخدماتها زيها زي الريف اللي ناقصها بس الزرايب وحظائر المواشي ..معلش دا تعبير قالهولي واحد حبيبب من سكانها.. لانه حاليا شايف ان اي ريف رغم افتقاره لميزة المدينه بقي أأمن وافضل من مدينه المتصوره علي الاقل الريف مفيش فيه بلطجيه ولا متسولين ولا حراميه وبرضو فيه خضره وزرع وهوا نقي.. تعالي بقي نعد مميزات مدينه التاريخ والسحر والجمال.. ونبدأ بالهوا.. النهاردة لسه بفتح الفيس لقيت عالم من علماء الطب كاتب علي صفحته ان هوا المنصورة مشبع بالامونيا طبعا اكيد تسريب من مصنع السماد اللي في طلخا شمال مبني المحافظه طبعا دي كارثة لان فيه مرضي بيعانوا من امراض الصدر غير الاطفال غير اصلا دي مش اول مره تحصل ويفضل الاهالي يستنشقوه لفتره ممكن يظهر عليهم امراض صدر.. الغريبه بئه ان اللي كاتب التويته طبيب وعالم وهو د جمال العبيدي ودا عالم طبيب يعني المفروض لو في دوله متقدمة وشخصيه زي ده كتب كده تعتبر شكوي واستغاثه والجهات المختصه باسرع ما يمكن تتحرك لعمل اللازم لكن من الواضح عندنا ان الجهات المختصة بتتغذي علي الامونيا او مبتشمهاش ويمكن عندها مناعه.. ما علينا تعالي بئه للمناظر الطبيعيه في المدينه اللي كان فيها جناين ومتنزهات وكانت مميزه بيها علي الاقل الخضره دي والشجر ده كان ممكن يمتص الامونيا من الجو وواحد عالم زي صاحب التويته وواحد غلبان زي حالاتي مش هيلاحظ مصيبة انتشار الامونيا في الجو.. الحدائق اغتيلت واغتصبت والملاهي قتلت بلا عوده واماكن التنزه وأدت ولن تظهر فلا جناين كجنينة الحيوانات التي افتقرت وافتقدت حميرها التي لا تتشابه مع حمير ارياف محافظتنا ولاقرود ولا فيله ولا اسود ولا نمور وان وجدت حتي يتعرف عليها اطفالنا تكون هزيله وضعيفه ولا تتشابه مع اسمائها التي يعرفها اطفالنا لذلك يحدث اختلاط ويتشابه عليهم الامر عندما يرون اسدا في التلفزيون وبيبقي مش مصدق ان ده اسد زي اللي شافه في الجنينه عندنا لانه اسد مربرب ومتغذي وشعره سايح انما اسدنا يا عيني غلبان وضعفان وهمدان ومش لايح يقف من الاهمال وقلة الاكل ..دا غير باقي جناين وحدائق ومتنزهات المنصوره..
نروح بئه للمواصلات والزحمه والتاكسيات والميكروباصات طبعا كل واحد عارف ايه اللي فيها لاتاكسي محترم نفسه وبياخد اجرته ولا تقدر تقول لتاكسي وديني المكان الفلاني الا ما يتفق معاك علي الاجره دا اصلا ان وافق يركبك لان معظم التاكسيات بتفضل تاخد راكب واحد بس عشان في طريقه يركب واحد واتنين في مشوار واحد…وطبعا الميكروباص كلنا الارف بيقسم الخط لكام اجره.. بلاوي ومصايب ومعظم السوائقين تحسهم سوابق او خريجين سجون.. اه وربنا
روح بئه في كل اشاره المتسولين والشحاتين ودول فيهم النشالين واحد يجي يستعطفك و التاني من شباك العربيه التاني يشقط اي حاجه من العربيه سواء طال موبايلك او شنطتك.
برضو مش مهم..
روح بئه اركن عربيتك في اي شارع ويكون غير مخالف تبقي دكر وجامد لومدفعتش للبلطجي اللي ماجر الشارع. بمزاجك غصب عنك هتدفع والا هترجع تلاقي عربيتك فيها مصيبه مخبوطه ..عجل نايم.. بطاريه مسروقه.. واخبط راسك في الحيط ..مشفناش حد عشان كده بتدفع وانت ساكت جباية الحمايه.. مأساه ومصيبه.. حتي سكان الشارع قادر عليهم
دا غير بلطجة الشوارع وكلنا شفنا وعرفنا اللي حصل غير النشالين اللي واقفين عيني عينك في المواقف ومحدش بيقدر يكلمهم او يتعامل معاهم… .
كل ده اعتبروه لا شي الجي مصيبه.. ياعالم ياهووه.. حد عمره شاف كلب ومسعور كمان يمشي ويتمخطر ويعض في مكان راقي في المنصوره… اهو حصل وحدث ولاحرج.. الزباله بقت تجمع الكلاب والكلاب عددها يزيد ماهو مفيش رقيب والاكل والشرب موجودين ببلاش ومفيش تحديد نسل يقوم ايه يخرج من وسطهم كلب ضال وبلطجي يتهجم علي مخاليق ربنا.. يلا خير اهو حصل والناس اتعضت من الكلاب ..لسه عض القطط
ايوه ما القطط ماليه شوارع المنصورة زيها زي الكلاب ومحدش بينتبه الا وقت العض.. وفي انتظار عض القطط عشان الساده المسؤلين يعملوا حملة مقاومة العض وتحرش الكلاب والقطط.. الحمد لله جمعت المنصوره جميع انواع مشتملات التلوث.. سمعي بصري لفظي بلطجي ..كله كله
كل ده بدون ضابط او رابط يحسسك اننا عايشين فيما وراء النهر.. مش في مدينة السحر والكلاب.… قصدي الجمال
لكي الله يا مقهوره.. قصدي منصوره..
0 comments:
إرسال تعليق