احيانا كتير ورغم ان الظروف بتكون ميسره او معسره بتلافي نفسك مخنوق ومكتيب ومش طايق تكلم نفسك.. حتي لو جيت تفكر ايه اللي خانقك وموتر اعصابك بتتخنق اكتر.. ولو شيطان راسك هزر معاك بشوية تفكير عشان يوصل معاك للسبب بتبقي عاوز تخبط راسك في الحيط وتحاول تخرج الشيطان ده وتخنقه وتقوله انت مالك ايه حاشرك ملكش دعوه بي. كتير مننا كده وبتحصل لكل الناس علي كل المستويات وفي كل الاوقات.. اللي ظروفه صعبه بيفكر ازاي يعيش ويصرف علي بيته واولاده ويعيشهم علي اد دخله المحدود رغم ان وقته كل شغل ومعندوش وقت للفسح والمصايف والخروج
واللبس والسهر و دايما مشغول بطلبات بكره لان ملوش دخل ثابت زي مابنقول كده علي باب الكريم ورزقه يوم بيوم يادوب لو وفر مصاريف يوم او يومين قعد فيهم ملقاش شغل.. الدنيا بطربق عليه وشيطان دماغه يشتغل تاني شمال ويمين.. وتجري ادام عينه افلام فيها الابطال ولاده وهم جعانين او عريانين او مع حاجتهم يلاقوا الانحراف سهل فينحرفوا وتبدا المصايب علي دماغه.. هنا بيدخل في حالة اكتئاب توصله لمرحلة ياس من بكره وكره لحياته وليه واشمعني هو بقي ظروفه كده وليه مش بياكل ويلبس ويتفسح هو وولاده زي غيره ليه طلب اي واحد من ولاده يعمل حسابه ويفكر ازاي هيوفره وليه مصاريفهم عشان يجهزها يعمل عمليات اينشتاين عشان تكون جاهزة بعد يوم او اتنين او اكتر.كتير كتير بيحصله كده واحيان كتير بتيجي الحاله دي من غير سبب هو كده وخلاص مخنوق وارفان وزهقان من غير سبب..
طيب دا اللي ظروفه صعبه وعايش علي شفا المعيشه وحد الكفاف انما بئه لما تلاقي كي شئ ميسر فلوس واكل وشرب ولبس وعربيات وفسح… ودهب دهب دهب وتلاقيه مكتئب دايما وعنده يأس ومرض نفسي رغم طلباته موجوده من غير الحاح ولا توفير لبكره.. ويوفر ليه ماهو معاه فلوس لو اكل ورقها بس تكفيه وتكفي اجياله ..رغم فراغه وسهولة كل شئ ببفكر فيه.. ورغم انه ممكن شركات او منصب وحسابات في بنوك وواجهه اجتماعيه واجتماعات واولاد في تعليم وجامعات عاليه وراقيه وخروجات وفسح لكن نفسه مش راضيه ولا مطمئنه ولا مرتاحه.. ليه وايه السبب وكل مصالحه بتخلص في كل مكان واي زمان بإسمه او بفلوسه او بمعارفه..مش شايل هم مواصلات لان عنده بدل العربيه اتنين ويمكن تلاته غير عربيات ولاده وممكن مراته ولامطالب بيت واولاد لان الفلوس بالزوفه ومبتخلصش ولا هتخلص حتي لو الفقر جري وراه بطياره شبح ليه وهو معندوش مشكله في بكره ولا قلق من جوع او فقر ..ليه دايما مش مطمئن ولا مرتاح ....
زمان الناس كانت عايشه لانت ولا تليفون ولا تلفزيون ولا تلاجه اساسا مكنش فيه كهربا ولا اي وسيلة ترفيه وكان وقت الفراغ طويل وكتير عند كل الناس وكانت طلباتهم قليله وصغيره والاهم رغم كل ده كانت القناعه والرضا موجودين ويادوب العشا او اكل بكره هو راس مال البيت ومكنش لا يأس ولا اكتئاب ولا تفكير في امور الناس وغناهم وفقرهم واشمعني فلان وعلان واشمعني انا معنديش ومش لابس انا وولادي زي فلان وابنه..يكاد يكون الغني زي الفقير في كل شئ.. الفرق كان الحصان والناقه والحمار… مش زي النهارده الفرق بقي كيا ومرسيدس والماني وياباني.. وطلبات تهد الحيل
القناعه والرضا علاج وربنا بييسر الرزق واسبابه لكل الناس ولو فكرت في اسبابه هتتعب لان الرزق ربنا اعطاه للكافر والمسلم والا كان سهله للمسلم وقطعه عن الكافر ..ويمكن ربنا منع عنك الغني لكن رزقك بابن بار بزوجه صالحه يسر لك رغم ضيقتك اسباب حصولك علي رزقك ..وكفايه انه مخلكشي زي الغني خايف من الفقر و دايما قلوق ومتوتر..
فكن قنوعايرسل الله لك اسباب الرزق ويسهلها ولو في بطن حوت في جوف بحر في ظلمات ثلاث.. والاحسن مش هيجيلك فترة اكتئاب ولا ياس وتدور علي اسبابها لان سندك ربنا..
0 comments:
إرسال تعليق